Act 10 | ASO | STEP | Kaesalea ebeku' Loma amiliti gizebo ve ma minine' gulive Konelio'. Italia misuboukoti' ami vanu hadeti (100) neti gizebo ve minine'.

Acts 10

Konelio' O'mosola Nolivo Angelo' Mali'mo Soto' O Emo Gamazi Lo-imine' Gamazi

1 Kaesalea ebeku' Loma amiliti gizebo ve ma minine' gulive Konelio'. Italia misuboukoti' ami vanu hadeti (100) neti gizebo ve minine'. 2 Aza O'mosola gelekele' ogo ezela lulo molo minaa' ive minine'. Ido' eze zuhosi a'mine'mine igi minani'. A'mine ve nene Zuda ve nasahili' o-ngedo hize ele' o-ngedo mino O'mosola gamene gamene lo minaa' ine'. 3 Ne'mine ogo minavo gamene ma tili kiloku ogavo O'moso'mi angelo' mali'mo velelo' o molo neida dizo Konelioo lavo ninge lamine' ine'. 4 Ningo gisili hizo ningo ehelele izavo ti' lo line': Guvekasi ve make, nadive. Lavo aza ti' lo lo-emo line': O'moso opo'ni laa' naine' ido' evene' nasahili' o-ngedo hize ele' o-ngedaa' naine' ma ne'mi guvele likevo O'moso'mo ningo gelavo lamine' ogave. 5 Nemu' gaza ve ma Zopa ebeta ngimiselanivo vi ve ma gulive Simoni' ado' gulive gohi ma Petolo' ve lo minine' nene ele'mizi alizave. 6 Aza abalaho ma Simoni' ize losuvo do lamine tamine' oga' ive'mi numuno ado' guvo noso gahevela neingu' neine' ma ne ele'mizi alizave. 7 Angelo' aza ti' lo lo-emeko vavo Konelio' nene gelekele' izipe setakisi ido' eze nasahili' o-do minaa' ine' ami ma lulo O'mosola molo minaa' ive nesi asi lo 8 a'mine gamazi muki' lo-ngemo Zopa ebeta ngimiselavo vani'.

O'moso'mo Petolo'ni Vamu' Elebizidoti' Nene Evene' Ma Zuda Ve Minamangumu' Nene Ha Nite' Ve Ido' Goloso Ve Lo Lamilido' O Neingumu' Elebizine' Gamazi

9 Ingi go' lavo ingine akalo' nivi a'mine ebe' di alitilisa navo holise' Petolo' aza numuno mulolo' O'moso opo'ni lolosa dize minine'. 10 O'moso opo'ni lo mino noso' nitekumu' isavo a'minemu' lavo gizi vata' i-di nizavo vele gala monavo ongo mino vamu' ti' lo ningine'. 11 Okulumo' ne godavo inite' ma lavolavo naba gidini minine' ne lumolati' lumolati' di uhu'vizi hulikevo misubola zou zou lo nolimivo ningine'. 12 A'mine'mi lulou' nene gaha nama ido' gosihe' ido' nama ato ato' gopo' napa minani'. 13 Ne'mine ogavo ezemu' gamazi ma ti' lo soto' ine': Petoloo, oto ma belo novo. 14 Lavo Petolo' ti' lo line': O've. Guve'nesi ve make, ne nomive. Ha nitekisi goloso nitekisi mosune' nene gopo nosa'muve. 15 Ti' lo lavo gamazi ma imine' molo ti' lo line': O'moso'mo inite' mamu' goloso nite' do hulo do lamine' ogavo ma a'mine inite' nene mo ha nite' ve goloso nite' ve lamo ha dalosane. 16 Ne'mine lo line'za a'mine gamazi li volelo' melo' igi likesivo gamene setohamo ogavo a'mido' geto a'mine inite' nene gelelehe' ogo Okulumoku' dizo vine'.

17 Dizo vavo Petolo' vamu' ningine' ne'mi monovo vise' ogo ne nani vamu' ninguhe lo gopo gala giline'. 18 Gopo gala gelo neivo Konelio' ngimiselive ingine Simoni' numu'vemu' longo' longo' i'mi vi di soto' igi gatedo' mini asi li ti' li lani': Simoni' ado' gulive've gohi ma Petolo' ma nene mene numungu' neihe. 19 Likevo Petolo' aza vamuto' ningine' initekumu' nene gala gelevo' gelevo' ogo neivo O'moso'mi Sikalahu' ne'mo ti' lo lo-imine'. Gelezo. Ve setohamo geikumu' nave. 20 Oto lemo gaka muki' gelamo engikisi maka' vilo. Na'nise'ne neve geito' ngimiseluvoni' ve. 21 Lavo Petolo' aza oto a'mine ve nizada lemo ti' lo line': Lingine vise' nave ne mene nouve. Ido' nanitekumu' nave. 22 Lavo ingine ti' li lani': Ami ve vanu hadeti (100) neti gizebo ve Konelio' aza ve lamine' mino O'moso gelekele' o-daa' ive Zuda ve mukilite gamangi mili-daa' ave aza nene O'moso'mi angelo' mali'mo lo-emavo gei' nene gele'mizo numu'vela vokunivo Konelio' nene vekati' gamazi gelelove lo limiselavo noune. 23 Likevo Petolo' ngele'mizo numungu' dizo holomo ngemavo mini ingani'.

Petolo' Konelio' Neida Vine' Gamazi

Ingi go' lavo oti Petolo' ve Izesu' evenele zuho Zopa misubou' minani' linge masi a'mine avesi maka' vani'. 24 Akalo' ingi oti Kaesalea ebeta vi hetelani'. Hetelikevo Konelio' eze zuhosi ido' ei' zogo lamine' molavesi do mulise molo-ngedavo Petolo'nimu' gizebo igi nizavo 25 vi heteli Petolo' numungu' nodizivo Konelio' gubi' ize emo opo'ni line'. 26 Opo'ni lavo Petolo' aza ti' lo line': Otezo. Nasi haza evene' nouve lo do ote-dine'. 27 Do ote-davo gamazi li volelo' melo' igi dizi evene' muki' mulise mili nizavo ningo 28 Petolo' ti' lo lo-ngimine': Lingine Zuda ve leli' monovo mo gili nizave. Lezesi ido' venenga aleve linginesi do volelo' melo' ogo bizo minamolone li li huki nizani' ma neine'za evene' mamu' ne ha nite' ve ido' goloso ve lo lo-ngedamozo lo O'moso'mo nelebizo lo-nemavo gelekuve. 29 Nemu' lingine asi likevo a'manapa amo okuve. Lingine nanitekumu' asi li-nidave. Ne'mi monovo likevo gelelove. 30 Lavo Konelio' lo-emo ti' lo line': Inite' ti' ogo soto' o-nididoti' gamene setohamo ogo vave. Naza numu'neu' mino tili kilokulo' O'mosola noluvo ve ma genegana'veloti' silingenge'ne hulo minivo ve'nelo' o molo 31 ti' lo line': Konelioo, O'mosola laine' ma ido' evene' nasahili' o-ngedo hize ele' o-ngedaa' ane' ma O'moso'mo gele lamine' ogave. 32 Nemu' gaza Zopa misubouko evene' ngimiselanivo vi Simoni' ado' gulive gohi ma Petolo'ni ma ne ele'mizi alizave. Aza nene abalaho ize losuvo do lamine tamine' oga' iveli'mi numungu' ado' guvo noso gahevela ne neive. 33 Ti' lo lo-nemavo nemu' nene geto ngimiselekuvo geita vikevo gaza gamazi'ine gelo oganivo mulu'neu' lamine' gelekuve. Idi'nise nene O'moso'mo lo-gidine' gamazi lanivo gelelone lo O'moso'mi velelo' mene do gese' ogo geikumu' gizebo none.

Konelio' Numu'veu' Izesu' Monovo Petolo' Lo-ngimine' Gamazi

34 Ne'mine lavo Petolo' api' ogo ti' lo line': O'moso'mo nene evene' muki' leli' okodemu' gilivo ivile' avile' osa'mive. Nemu' nene idi'ne gelekuve. 35 Numudo' namado' ve engitati' ezemu' opo'ni li gelekele' i-di inite' lisihekovo' igi mili lamine' minave muki' nene ninge lamine' o-ngedaa' neive. 36 Gamazi ma Isilaele' alevemu' huline' nene Izesu' Kilisito' ne'mo evene' mukiliti Guvetesi ve O'mososi do bize-ledo do hongu lo-ledelive lo lo soto' ogo gamazi lamine' line' nene gili nilisave. 37 Ido' Zohane' aza noso hilalizave lo lo soto' ogavo nGalilaia misubou' api' ogo Zudaia misubo mukiku' hutile' ogo soto' ine' inite' nene gili nilisave. 38 A'mine inite' ne'mino neive. O'moso'mo Nasalete ve Izesu' ne'mo gono dalive lo Sikalahu've emo amuzo emavo O'moso'mo ezesi mininako evene' hize ele' o-ngedo Satani'mo ngele'mize goloso palasa ivo minave muki' nene do lamine' o-ngedo minine'. 39 Aza inite' muki' ine' nene Zudaia misuboukosi Zelusalemi ebekukisi ine' ne la'lisete ninge none' ma ve. Lohoto' zalo' bilani'za 40 helavo gamene setohamo ogo vavo O'moso'mo gohi do ote-do eze evenele linge nene do ngelebizavo ningani' ve. 41 Evene' mukilite ningavoba asi eze ningo gamazi lo soto' olosune lo gozopo' aka'milati' do kegese-lidive lelikovo' eze ningo hilinguti' oto neivo ezesi noso' nite' maka' nune' ve. 42 Ido' leze vetesi ha nonivesi ido' hilavesi gonito' okunivo gonito' gizebo ogo goni' gelelive lo O'moso'mo do kegeso ele'mize molave ve loo lo soto' o ngemo minelone lo O'moso'mo lo huko-lidine' ve. 43 Ido' O'moso'mi gamazi've li soto' iga' ave mukilite eze gamazi've ne'mine li gizi milani' ma neive: Ezemu' gili amuzo milaliza aleve muki' O'moso'mo Izesungumu' ve lo lihime'ine apase-ngedeleseive lo Petolo' line'.

Sikalahu' Nene Zuda Ve Minamani' Heta Ato' Vela Limine' Gamazi

44 Petolo' aza mene gamazi nolivo a'mine gamazi gili minavela O'moso'mi Sikalahu' limine'. 45 Lemavo ato ato' gamaziuti' li O'moso opo'ni nilavo gilani' nenako nemu' nene Izesu'nimu' gili ele'vole' ani' Zuda ve ado' Petolokisi ave ingine O'moso'mo Sikalahu've nene haza heta ato' vesi lehize-ngidingumu' nene upuho' igi O'moso di naba i-dani'. Ne'mine ikevo Petolo' ti' lo line': 47 O'moso'mi Sikalahu' lelita limine' ma'mino me ve inginelasi lemanako laza nene noso holo-ngedamolone lo o've lo-ngedamolone' ogave. Olo. 48 Ne'mine lo Izesu' Kilisito' gulivelo' noso hilalo lavo mono' noso hili-ngidikevo ingine gamene ngomosi' Petolo' engita minelive li likevo ngomosi' ma minine' ve.